( حكتني أمي في الناموسية حكاوي حلوة حجازية) الجزء الاول

أنبعة ( أربعة ) حكاية حجازية مضحكة

كان يا ما كان في قديم الزمان وسالف العصر والأوان

, كان في واحد رجّال إسمه أسامة بخيل جداً وبنص لسان يأكل الحروف,

ويا دوب ينعرف منه الكلام , وكان ما يجيب إلا القليل من مقاضي البيت,

ولا يجيب الشيء على قول المثل ( حتى ينشف الريق ويعمي الطريق)

وفي شهر الحج فرحت زوجته حصة وقالت : أكيد أُسامة يوم النحر يوم

عيد المسلمين

يجيب خروف وينحره ويضحي زيّ المسلمين .

إللي له كم سنة لا ذبح ولا يعرفوا طعم اللحمة منه كيف ؟.

ولا تأكلها إلا إذا راحت اتغدت عند أهلها.

وفي الأخير جر أسامه نفسه جر وراح على سوق الخرفان وبغى يموت,

أو تجي له صرعه وهو يسمع أسعار الطليان .

ورجع وهو يتعكز على الجدران جاته حمى من غلو الأسعار .

مر على واحد يبيع رجول الطليان ومن بخله ولؤمه يا دوب خرج
القرشين

واشترى بيها الرّجول . أخذ أربعّة في كيس ورجع على بيته

قامت حصة سنت السكاكين والسواطير . وعبت التباسي والقدور .

وانفجعت بدخلته عليّها بكيس الرّجول .

قالت: يا مصيبتك بدل الخروف داخل علىّ برّجول ؟

قال لها: أتمعي ياحلمة أُتيحيها مدادم أنا تعبان ومسحن من إنتفاع الأسعان

(اسمعي ياحرمة أطبخيها مقادم أنا تعبان و مسخن إرتفاع الأسعار )

وارتفعت درجة الحرارة عنده وصار جسمه نيران .

قالت: ( يا رب نومة بلا قومة ) حسبي الله عليك من رجّال,

ما تفرحنا حتى مع أيام فرح المسلمين , خصرها وخرج وسابها تبربّر

وتندب حظها .

قامت حصة وطبخت المقادم الأربّعة وظبطتها, وسوت سلطة بالثوم

والكزبرة وفتت العيش

وسقته بالمسلوقة وهي بتسوي أكلها , جاعت ومرمشت وحدة من

المقادم ورمت الزبالة بعيد عن البيت .

عبت حصة السفرة وصحت أوسامة على الغدى , وجلس لى السفرة

وريحة الكشنة تخرق الخُشم وتطلع مع النخاشيش .

جلسوا على السفرة ويا دوب حطت حصة أول لقمة في فمها.

قال :ودفي هادي تناته مدادم فين الأنبعة ( وقفي هادي ثلاثة مقادم فين الأربعة)

قالت : إنت جبت ثلاثة مو أربعة.

قال : لا أنبعة كذيته حصة

وقالت : يا رجّال . قال : أنبعة يعني أنبعة .

صاح أوسامة وناح وساب الأكل وقام قوام , وراح على غرفته زعلان لا أكل ولا شربّ

ليله كاملة بالتمام . أكلت حصة وشربت وخصرته قيد قلبها عليه مليان

راحت عليّه ثاني يوم لقته فوق فراشه نايم غضبان . قالت له : قوم

كُل وأشربّ لك يومين وإنت على هذا الحال , قال أسامة : أنيعة !!!

قالت له : ثلاثة . دار وجه على الجدار وخصرها ونام وهو يقول : أنبعة يا بنت الكنب(الكلب) أنبعة.

تركته حصة وقامت سوت شغلها ونامت , وفي رابع يوم راحت معاها

أكل وموية قالت له : قوم بُل ريقك , ريقك نشف راح تموت .

فتح عينه ويا دوب نطق ( أنبعة ) وغمض عينه .

شارف أسامة على الموت . تركته حصة و قالت : الله لا يردك . وقامت

سوت شغلها وفي العصر جات لقته لا يضرب بيد ولا برجل.

نادت حصة أهل الحارة شافوه قالوا : هذا بيطلع في الروح . طلبت

حصة منهم تودعه لآخر مرة جات عند رآسه وقالت : ثلاثة مقادم .

يادوب رفع اصابيعه الأربعة ورخاها ومات

قالت: مع السلامة جذوة . قاموا غسلوه وكفنوه وأخذوه وصلوا عليه ودفنوه...

طلعت روح أسامة وهو رافع اصابيعه الأربعة من بخله يا لطيف . وبعد

ما دفنوه فكت حصة السحارة لقيت فيه خير كثير ومال وفير

وصارت تشتري وتأكل وتتصدق على الفقراء..

أتزوجت حصة بعد مدة واحد ثاني , إسمه هلال وعاشت باقي عمرها

مبسوطة في سعادة بعيدة عن البخل والبخلاء.

معاني المفردات

يا دوب: بالنادر

مقاضي البيت : طلبات البيت

بغى يموت : كاد يموت

تجي له: يصيبه

يتعكز : يتكي

التباسي : الصحون الكبيرة

انفجعت :انصدمت وذُهلت

خَصَرْهَا: تركها ولم يلتف لكلامها( طنشها)

سابها : تركها

تبربر : تتكلم (كناية أنه ما كان يسمع أيش تقول)

ضَبَطَتْهَا : أتقنت طبخها

مرمشت :أكلت الرِجل بأسنانها وما بقت فيها حاجة

النخاشيش :أعماق المخ ( كناية عن أن ريحة الكشنة دخلت من الأنف وتعمقت داخل الجمجمة)

قوام : بسرعة

قيد قلبها :يعني من أول قلبها مليان عليه

بُل رقيك : ببلل فمك بشويى موية

سوت شغلها : قامت بعملها في البيت

جات لقته لايضرب بيد ولا برجل: لما جاءت وجدته ماينطق ولا يتحرك

رخاها: نزلها.

السحارة : الصندوق اللي كانوا زمان يحطوا فيه أغراضهم.

هههههههههههههههههههههههههههه
وش استفاد لااستمتع بالاكل ولا بفلوسه اللي مااااات وسابها
اهم شي انبسطت بعد ماماااات ههههههههه

هههههههههههههههههههههههههههه شوفتي كيف اخر البخل

» ( حكتني أمي في الناموسية حكاوي حلوة حجازية) الجزء الثاني
» اكلات حجازية بلهجية مكاوووووية